bononinus

, appellatio communis pluribus monetarum speciebus civitatis Bononiæ, nam eo nomine designabatur antiquitus tam denarius ex ære conflatus, quam grossus ex optimo argento, cujus valor denariorum duodecim erat, nec non ducatus aureus purus, pretii tum triginta quatuor bononinorum grossorum. Unaquæque tamen horum numismatum species proprio adjectivo distinguebatur : scilicet prior appellabatur Bononinus parvus, altera Bononinus grossus seu argenteus, postrema Bononinus grossus aureus. Tardius aliæ percussæ sunt Bononiæ monetæ, appellatæ Bolognini, et mezzi Bolognini : priorum viginti, alterorum quadraginta libram æquaverant.

, Pondus unius unciæ, sive unius denarii. Stat. Bonon. ann. 1250-67. tom. 1. pag. 181 : Et triculos oleum vendentes cogam habere mensuram rami bollatam de libra, de media libra, et de uno bononino ; quæ ultima vox in Codicibus annorum 1259-67 permutata est in alteram ejusdem valoris, i. e. de una denariata ; nam denariata in libra pars est duodecima, que bononinus parvus, ut dictum est, in bononino grosso. Inter vocabula de novo addita in recentiori editione Glossarii allata est huic voci interpretatio, de qua est sermo, sed non absque aliqua dubitatione, ut patet ex his verbis : Denariata, Pondus, ut videtur, unius denarii. Quæ vero significatio ob locum Statutorum bonon. superius allatum explorata habenda est. Fr.

bononinus

Saved

Recent